عبايات البنات
((نقطة صراحة… أتكلم عن نفسي مثل ما أتكلم عن البنات الباقي وعادّة نفسي مو أحسن من الناس الي كتبت الموضوع عنهم..))
ملاحظة.. الموضوع مكتوب من فترة.. بس أجريت تعديلات عليه
موضوعي اليوم حساس
ويمس حياتي مثل ما يمس حياة معظم البنات الي أعرفهم،
كم مرة البنية تسوي عباية بالسنة ؟
وكم زيارة تكون لها عند محلات العبايات؟
وكم موضة بالسنة تطلع؟
وكم نسبة الي يفهمون مفهوم العباية الصحيح؟
أسئلة تطرح نفسها طرح في مخي كل مرة اجوف وحدة لابسة فستان سهرة وتسميه عباية….
وخلني أقتبس من الدكتورة فوزية لما تقول
"لما نبتدي نسمي الأشياء بأسمائها الصحيحة، نبتدي اول خطوة في حل المشكلة"
الي صاير اليوم.. ما صار في يوم وليلة.. ولا نمنا الصبح وقعدنا و جفنا محلات العبايات صارت كلها نسخ من بعضها..
الي صاير اليوم شيء مبتدي من زمان.. من أول ما طلعت عباية الكتف أو الكتافية أو البالطو او عطوه أي إسم تحبونه…
استقبلنا هالموضة أول مرة لأنها كانت عملية أكثر من دفة الراس.. بالنسبة لنا أحنا كبنات في بداية عمرنا وبداية بلوغنا وسترنا.. وبالنسبة حق النساء العاملات.. وبالنسبة حق شريحة كبيرة من النساء الي كانوا يجوفون روحهم أصغر بالعمر من إنه يلبسون دفة الراس.
المهمـ ،
بغض النظر عن الفئة الي تلقّت هالموضة في بدايتها أو السبب اللي تقبلتها عشانه..
صارت هالموضة الي كانت قبل فترة بسيطة شيء غير مقبول.. عادية.. مدام توفر فيها الستر والحشمة في اللبس
_ قل عدد المعارضين لها_ مع زيادة عدد البنات المؤيدين لها..
شوي شوي.. تمت تطلع هالموضات.. مرة مفتوحة من تحت..
ومرة مفتوحة من فوق
ومرة فيها ((تطريز وخياط )) بألوان
ومرة فيها قطعة سوداء على أشكال ورود وزخرفات
وبعدين القطعة تطورت وصارت رصاصية
وبعدين حمراء ووردية وزرقا وخرابيط لها أول مالها تالي..
وماله داعي أعدد الموضات لان ويا كل اسبوع اجلت فيه كتابة هالموضوع، طلعت موضة يديدة.. !
وطبعاً ويا كل موضة
لفت النظر
ابراز شكل الجسم والمفاتن
والتفرد والتميز الشخصي
مطلوبين !
أما عبايات وموضات اليومين دول
فحدّث ولا حرج…
الفراشة والخفاش والكنغر << ما تم أحد في حديقة الحيوان ما سموا باسمه
وغيرها وغيرها وغيرهاااا
الفراشة امممم اهي على تصميم الجلابيات المجنحة.. الي لها أجنحة في اماكن اليدين.. ما أنكر إن هالنوع من العبايات ضاف ألق على النساء الكبار.. عطاهم تفرّد وشخصية تليق بعمرهم.. بس من الناحية الثانية البنات الصغار ما كان حلو عليهم ومصخوها بالالوان الي حطوها في الزيج شيء وردي وشي أزرق وشي مادري شنو
والي أخس وأعظم…
موديلات السنة..
ألوان وخرابيط على كيف كيف كيف كيفك
مهرجان ألوان على العبايات الي على حسب قول أمي العزيزة صارت تنافس الجلابيات في ألوانها..!
في كل عباية على اليدين ومن ورا والشيلة نقشة كبر ويهي وملوّنة..
هاذي عباية ستر ولا تهريج ؟!!!
أنا مهمن رحت فوق ولا نزلت تحت بظل بنية، ولا أقدر أنكر إن ألق وجمال الألوان يجذبني.. وإن الموديلات الي سبق وقلت تشبه فساتين الحفلات بعد تلفت لي نظري.. وتعجبني
بس إذا فكرت بيني وبين نفسي.. أنا بلبس العباية ليش ؟ أصلاً أنا بتعب عمري وفي هالجو الحاااااار الخنقة بلبس عباية وشيلة ولا حجاب ليش ؟؟
مو عشان الستر ؟
انزين… اذا عشان الستر..
وين الستر والحشمة من الألوان الصارخة ولا الموديلات الي تصيح "تعالوا جوفوني"
الي نجوفه اليوم غزو مو طبيعي لأفكارنا ومعتقداتنا الي كانت أيام زمان ثابتة وراسخة ولا تقبل التشكيك..
عيل (الحفاظة)** بذمتكم الحين تسمعين بإسمها تشتهين تلبسينها ! ؟
** الحفاظة أو الكنغر على حسب علمي إهي العباية الي تكون واسعة بس في الوسط تجتمع أطرافها الواسعة في بروش…
أعداء الإسلام والمسلمين **** حسيت روحي من اخواننا المطوعين وانا كاتبة هالجملة 
****..
ما طلبوا منّا أنّا نخلع لباس الستر.. بالعكس قاموا يصنعون لنا الشيلات والعبايات ويمولونا بأحسن وأحلى الموضات والألوان والزخارف عشان ما تكون البنت المتحجبة أقل من غيرها
ولا تكون مغلفة في اللون الأسود..
ألحين صارت البنت المحجبة تنافس غيرها في الموضة.. والألوان والستايلات
****
بصراحة.. صرت ما أقدر ألوم أي صبي يقول لي إنه ما يؤمن بالعباية.. ولا يبي يتزوج وحدة تلبس عباية..
_ الي ما تلبس عباية عذرها معاها بدلة ولازم ملوّنة بس الي تلبس عباية.. قصدي ما يسمى بالعباية( أكمل الفراغ )
لأن عبايات هالايام ما يصلح يتسمون عبايات..
الستر أولاً فكرة.. ورأي وإيمان داخل البنية..
وبعدين تطبيق..
إذا انا مب فاهمة أساساً شنو معناة الحشمة.. وشنو مفهوم العباية شلون بدش محل العبايات وبفكر وبفهم وبختار الأصلح لي..؟
أنا ما ألوم أحد.. ولا أقصد احد معين في كلامي..
بنات وايد طايحين في الغفلة و لا لاقيين الي يوعيهم وينصحهم ويفهمهم، يعتبرون أي شي ينتشر بين البنات إنه موضة وعادي وشيء طبيعي.. صرت أفتقد صراحة روح التفرد في البنات.. الروح الي تخلي كل وحدة تصير مثل ما تبي.. مو مثل ما باقي البنات يبون !!
آخر شي حبيت أقوله…
أنا ما اقول خلوا كل لبسكم أسود في أسود سادة بدون زينة بسيطة لو حق نفسكم على الأقل
بالعكس.. كل وحدة خل تفكر في الي يناسبها، يناسب دينها ومعتقداتها الشخصية، ويناسب شخصيتها.. وحتّى إمكانياتها الماديّة*
لا تخلونا نصير بنات كوبي بيست من بعض في كل شي، في اللبس وفي الحجي وفي الاهتمامات..
"الموضة" أحنا الي نسويها مو اهي الي تسوينا !
* وصلنا خير للامكانات الماديّة..
تبطّر على النعمة ! هذا كل شيء أقدر أقوله !
عيل عباية بخمسين وستين وثمانين دينار ؟!!
وفي السيف ب 200 و300 دينار .. ومين يزوّد
على بالهم كلما زاد ثمن العباية بتحلى البنية وتكبر في نظر العالم.. عشان اذا راحت حفلة وسألوها بجم سويتيها تقول بثمانين دينار وكأنه فخر !
والمشكلة عادةً الي من هالنوعية ولا يرضون الا بالغالي والنفيس يكون ذوقهم مو شي وفي أغلب الاحيان ينقص عليهم !
أنا بصراحة ولحد يحسبني بخيلة بس مستحيل أرضى أحط مثل هالمبلغ في عباية..
أهو مو فستان ولا شي أفوشر فيه جدام العالم..!
ولا اهو بدلة سهرة او مرصعة بالاحجار الكريمة عشان هيك مبلغ !
_ ( بس لازم أقول إن فيه موضة بين بنات البحرين الله يحفظهم ويرضى عليهم إن اذا عندها مناسبة أو عرس من بدال لا تشتري فستان أو بدلة وتسوي شعرها وتعور راسها تسوي لها عباية وتحط لها شوية ميك أب وخلّصت كشختها حق العرس)_
بس فيه أوادم كلش ما تعرف مصلحة عمرها !!!!!
وماقول الا الله يساعد التماسيح
لأن بالنهاية السحلية بتلبس
واهو بيدفع
&&&&&
تعليق شخصي..
كل مرة أسوي لي فيها عباية تلوع جبدي !
ماحب الخرابيط ولا أحب الألوان ولا أحب المبالغة في العباية..
وكل الي ألاقيه يا موديلات قديمة عندي منها.. أو خرابيط ما تعجبني..
بس الشي الطريف هالمرة
إن وحدة من ربعي سوّت لها عباية بسيطة واايد بس ناعمة.. وفكرت أسوي مثلها بس قلت بجوف المحلات عقب بختار.. بس عقب جم محل اتصلت فيها وسألتها وين سوتها عشان أسوي مثلها لأن كانت الحالة صعبة في المحلات
السالفة إن عقب اسبوع لما تجمعنا ويا الربع اكتشفنا إن كلنا قلدنا على رفيجتنا وكلنا رحنا نسوي من نفس المحل بالصدفة طبعاً
بس شي حلو,, شلتنا كلها نفس الموديل… ومطقمين على بعض :$
_ حركات _
بس ما بشرح الموديل عشان محد يقلدنا :$
خلكم ويا الفراشة الملوّنة أحسن :$
آخر شي.. أتمنى كل شخص وكل شخصة
يتفكرون في كلامي عدل..
ويفهمون ما وراء القصد
أرق تحية
الحرة للأبد
Share This
